Dar es Salaam. Madereva wa malori yanayofanya safari zake ndani na nje ya nchi wametangaza mgomo kwa ajili ya kuishinikiza Serikali kusimamia mikataba ya ajira ambayo mpaka sasa hawajapata.
Uamuzi huo umefikiwa baada ya kuunda kamati ya
kushughulikia suala hilo ambapo mpaka sasa Serikali na waajiri wao
wameshindwa kulitekeleza jambo ambalo limewafanya wawe vibarua wa
kudumu.
Wakizungumza na waandishi wa habari jijini Dar es
Salaam jana, Mwenyekiti wa kamati hiyo, Rocket Matogoro alisema kuwa,
mgomo huo utaanza Mei 10 mwaka huu ambapo madereva hao hawataendesha
magari hayo mpaka suala hilo litakapotekelezwa. “Madereva wa malori
tumeandaa mgomo ili kuishinikiza Serikali kusimamia mikataba yetu ya
ajira ambayo mpaka sasa imekuwa hewa, jambo ambalo linatufanya waajiri
watudharau,”alisema Matogoro.
Alisema kutokana na hali hiyo madereva hao siku
hiyo hawataondoa magari katika maegesho mpaka suala hilo
litakapomalizwa. Mbali na hilo,madereva hao wameitaka Serikali kujenga
maegesho ya magari katika vituo ambavyo vimepangwa ili kuondoa usumbufu
unaojitokeza sasa.
